補習-教材招標 孫公認靠嚇

http://www.hktutorcity.com-上門補習

由教育局副局長陳維安領導嘅「學與教資源檢討工作小組」，原本用以研究分拆教材定價及由政府招標出版教科書等減書價嘅建議，結果爛尾收場，最終變成發展電子書。局長孫明揚前日交代小組報告書時否認爛尾，死撐話係要「引入競爭」，備受批評。直到尋日，孫公終於投降，承認「招標」引入課本競爭只係想嚇吓出版商喎，點知靠嚇不成，要以開拓電子書市場遮醜，仲想利用草擬緊嘅《競爭法》去打壓出版商。

孫公前日公布，話接納副局長陳維安提交嘅報告書，建議透過發展獨立嘅電子書市場，引入更多良性競爭，改變現時扭曲及壟斷情況。不過，孫公五月底曾高調向出版商發「最後通牒」，話會以「招標」出版教科書，威脅出版商於本學年全面分拆教材定價。呢句說話事隔半年仍言猶在耳，但佢前日卻再三迴避係咪招標爛尾，只不斷數出電子書嘅優點，似係想轉移大家視線。


放大圖片
直至尋日，孫公出席電台節目又再被追問係咪分拆同招標教科書「爛尾」時，佢似乎避無可避，惟有承認話：「當時用『分拆』、『招標』呢啲字係過分啲，其實係希望打破壟斷，引入競爭」，然後再為「電子版適用書目」重新制訂新規矩，包括從加入者嘅經營手法、質素及合理價錢等方面制訂「Q嘜」保證同監察喎。

謀用《競爭法》打壓出版商
當再被追問半年前所講嘅「招標」，係咪想嚇出版商？孫公就似乎被迫承認：「當時係有咁嘅考量，我哋都要表達一個咁嘅意思！」不過，佢又即時將教科書市場扭曲嘅問題，推番畀草擬中嘅《競爭法》，話到時會研究吓教科書市場有無以「合謀定價」來操控市場。原來政治同行政手段搞掂，仲可以利用法例去屈出版商，好聽啲講係高招，唔好聽就係手法低莊。

欣賞完孫公過去兩日嘅處事手腕，終於明白佢撈到今時今日係有原因嘅。反而佢副手陳維安就事件一直唔見影，完全冇交代過事件，亦無為事件負責，咁乜嘢叫做實施問責制呢？何來問責？